Vjeshta Eshte Shtepia Ime

Nuk di a ishte rastësi
Këtë e di veç heshtja jote
Dy rrugët tona sot përqafuan
Dy gjysma ëndrre, peng të një kohe.

Si bor’ u shkri, pikë-pikë kulloi
Ca mall, i athët si shegë majëhoshe
Kur sysh u puthëm, një çast të vetëm
Gjith’ koh’ e shkuar u tret në qoshe!
I pastër nga pështjellime metaforash të kota, i kthjellët në imazhe e lexim. Librat e përsosur nuk janë botuar kurrë, por këtu do gjeni poezi të cilat lexohen me ëndje e nganjëhere “e zgjidhin përfundimisht dilemën e zgjimit të brymës”.
—Arbër Ahmetaj
...në poezitë e freskëta të librit të saj poetik autorja i këndon me patos, dashurisë, jetës, bukurisë së natyrës dhe atje ku gjen zhgënjim me forcë dhe dinjitet di të dalë nga kjo gjendje edhe më e fortë, më e bukur e plot dinjitet.
—Kristaq Turtulli
...gjëja e parë që më bie në sy, është ndryshimi i saj nga njëri libër, tek libri pasardhës... Jam i bindur që ka rritje ose më mirë më bind libri i saj, që këto prurje poetike janë në rritje, sidomos në aspektin cilësor, i cili është treguesi më bindës i mbrothësisë së një poeti.
—Iljaz Bobaj
Dëshira për të jetuar është totale, vjen së brendshmi, duke mos parë pengesat dhe duke dashur të zhdukë hermetizmin në një marrëdhënie. Kjo gjë shprehet shpesh me anë të fjalive thirrmore dhe situatës komunikative që krijohet nga prania e dy vetave. Poetja ka aftësinë të dallojë ngjyrat e dashurisë edhe në terr...
—Marjana Hushi
Është një poezi ku figura dhe simbolika zënë një vend qendror dhe ku aktualiteti dhe alegoria evidentohen më së miri. E thjeshtë në dukje, por e ngarkuar me ide dhe lëvizje, autorja i vendos atribute dhe misione të caktuara fjalës, duke e shndërruar atë nga e zakonshme në bartëse dhe artikuluese të vetvetes.
—Agim Bajrami