Pasioni I Fundit Dhe Vdekja E Princeshes Diana

Në këtë libër, Tomas Sankton dhe Skot Meklod, përkatësisht shef i zyrës në Paris dhe korrespondent në Lindjen e Mesme i revistës amerikane Time, shtrojnë të gjitha pyetjet që çdokush i bën vetes qysh se Diana, princesha e Galesit, dhe Dodi Fajed vdiqën në një aksident makine në Paris në të gdhirë të 31 gushtit 1997. Si ndodhi që një njeri i dehur, nën efektin e antidepresivëve, mori timonin e mercedesit ndërkohë që nuk kishte aftësi për të drejtuar një makinë të tillë? Përse po ky njeri, Henri Pol, nëndrejtor i ngarkuar me sigurinë e Ritzit, jashtë shërbimit atë mbrëmje, u kthye në hotel në orën 22 e 8 minuta? Cili ka qenë me saktësi roli i paparacëve që i ishin qepur pas çiftit gjatë gjithë ditës së 30 gushtit dhe që e ndoqën në atë garë fatale? Përse Dodi ishte aq i acaruar me fotografët sa të ndryshonte procedurat e zakonshme të sigurisë dhe ta vinte princeshën dhe veten në rrezik aq të madh? A mund të kishte shpëtuar Diana? Cila ishte natyra e vërtetë e plagëve të saj? Përse kaluan gati dy orë përpara mbërritjes së saj në sallën e operacionit? A ishte shtatzënë princesha e Galesit? Kush është i ati i Dodit, milioneri Mohamed Al Fajed, pronari i plotfuqishëm i Harrodsit dhe Ritzit? Si ranë çmendurisht në dashuri me njëri-tjetrin Dodi dhe Diana sa që parashikuan martesën e tyre për në vjeshtë? Mos është aksidenti pasojë e një komploti? Përgjigjet që janë pasqyruar në këtë hetim të bërë me imtësi, me ndihmën e të gjithë dëshmitarëve, ekspertëve dhe protagonistëve, zbulojnë të vërtetën që fshihet prapa kësaj tragjedie.